Luk 10 | BOJ | STEP | Bati bei Tamo Koba Yesus na tamo kalil a dauryosib laqneb qaji naŋgi metnjrnaqa aqa areq bonabqa naŋgo ambleq dena tamo 72 naŋgi giltnjrej. Naŋgi aqa anjam mare mare laqajqa deqa giltnjrej. Giltnjrsiqa naŋgi aiye aiyel qariŋnjrimqa naŋgi a qa namoosib qure kalil a segi bunuqna walwelosim gilqas qaji naŋgi deq gilqajqa minjrsiqa qariŋnjrej.

Luke 10

Yesus na tamo 72 naŋgi qariŋnjrnaqa naŋgi gilsib aqa anjam mare mare laqneb

1 Bati bei Tamo Koba Yesus na tamo kalil a dauryosib laqneb qaji naŋgi metnjrnaqa aqa areq bonabqa naŋgo ambleq dena tamo 72 naŋgi giltnjrej. Naŋgi aqa anjam mare mare laqajqa deqa giltnjrej. Giltnjrsiqa naŋgi aiye aiyel qariŋnjrimqa naŋgi a qa namoosib qure kalil a segi bunuqna walwelosim gilqas qaji naŋgi deq gilqajqa minjrsiqa qariŋnjrej. 2 A naŋgi qariŋnjrqa osiqa yawo anjam endegsi minjrej, “Wauq dia iŋgi gargekoba melionub. Ariya iŋgi meli bunuj otorqajqa wau tamo koba sai. Deqa niŋgi wau lanja minjibqa a na wau tamo qudei eleŋosim qariŋnjrimqa naŋgi aqa wauq gilsib iŋgi meli bunuj otoreleŋqab.

3 “Deqa niŋgi giliye. Niŋgi quiye. Niŋgi kaja du du bul deqa e na niŋgi qariŋgitqa gilsib bauŋ juwaŋ naŋgo ambleq dia walweloqnqab. 4 Niŋgi silali osib gilaib. Nuŋgo qaquŋ aib. Siŋga tatal jigaib. Niŋgi walweloqnsibqa gamq dia tamo qudei turosibqa naŋgi anjam bei minjraib. 5 Niŋgi tal bei gogetoqnsib mati tamo uŋgasari tal miligiq di unub qaji naŋgi endegsib minjroqniye, ‘Niŋgi are lawo na soqniye.’ 6 Degsib minjroqnibqa lawo tamo bei sqas di a nuŋgo lawo anjam di oqas. Ariya lawo tamo bei sqasai di nuŋgo lawo anjam di olo puluosim nuŋgoq bqas. 7 Niŋgi qure bei beiq di brantoqnsibqa tal qujaiq di soqniye. Olo tal bei bei gogetoqnaib. Naŋgi na niŋgi joqsib iŋgi ti ya ti anaiŋgoqnibqa uyoqniye. Niŋgi Qotei aqa wau tamo deqa nuŋgo awai agi oqniye.

8 “Niŋgi qure bei beiq giloqnibqa naŋgi niŋgi joqsib iŋgi anaiŋgoqnibqa uyoqniye. 9 Niŋgi qure dia sosibqa tamo uŋgasari ma ti unub qaji naŋgi boletnjroqnsib endegsib minjroqniye, ‘Qotei a bosim nuŋgo Mandor Koba sosim niŋgi taqatŋgwajqa bati agi jojomqo.’ 10 Ariya niŋgi qure beiq giloqnibqa naŋgi niŋgi qoreiŋgosib niŋgi gereiŋgosaiabqa niŋgi naŋgi olo uratnjrqa oqnsib naŋgo qure ambleq dia tigelosibqa naŋgi endegsib minjroqniye, 11 ‘Qotei a nuŋgo Mandor Koba sosim niŋgi taqatŋgwajqa bati jojomqo degsi merŋgonumqa niŋgi segi na saidosib Qotei qoreiyonub. Deqa nuŋgo qure qa tumbrum gago siŋga qandratqo qaji agi butuyetŋgonum.’ Naŋgi degsib minjroqniye. 12 E niŋgi merŋgwai. Mondoŋ Qotei na tamo uŋgasari naŋgo une qa peginjrqa batiamqa a na qure deqaji tamo uŋgasari naŋgi tulaŋ padaltnjrougetqas. Ariya Qotei na Sodom qure naŋgi degsim padaltnjrqasai. A na naŋgi gulube kiñala enjrqas. Di kiyaqa? Naŋgi ijo ñam qaliesai deqa.

Tamo uŋgasari are bulyqasai qaji naŋgi mondoŋ tulaŋ padalougetqab

13 “O tamo uŋgasari Korasin qure ti Betsaida qure ti di unub qaji, niŋgi tulaŋ padalougetqab. Tamo bei a Tair qure ti Saidon qure ti deq gilsiq maŋwa e nuŋgoq di yoqnem qaji di naŋgoq di yo qamu naŋgi nami are bulyosib naŋgo une qa are ugeinjrnaq unsib are uge qa gara jigsib ŋam sumq di awoeb qamu. 14 Deqa e niŋgi endegsi merŋgwai. Mondoŋ Qotei na tamo uŋgasari naŋgo une qa peginjrqa batiamqa a na niŋgi tulaŋ padaltŋgougetqas. Ariya Qotei na Tair qure ti Saidon qure ti naŋgi degsim padaltnjrqasai. A na naŋgi gulube kiñala enjrqas. Di kiyaqa? Naŋgi ijo ñam qaliesai deqa. 15 O Kaperneam tamo uŋgasari, niŋgi laŋ qureq oqwa kere e? Keresai. Qotei na niŋgi breiŋgimqa moio qureq aiqab.”

16 Yesus a anjam degsi marsiqa aqa aŋgro naŋgi endegsi minjrej, “Tamo bei a nuŋgo anjam qusim dauryqas di a ijo anjam dego qusim dauryqas. Ariya tamo a niŋgi qoreiŋgwas di a e dego qoreibqas. Tamo a e qoreibqas di ijo Abu e qariŋbej qaji a dego qoreiyqas.”

Tamo 72 Yesus na qariŋnjrej qaji naŋgi olo Yesus aqa areq beb

17 Ariya Yesus na tamo 72 naŋgi qariŋnjrnaq gilsib aqa anjam mare mare laqneb. Onaqa bunuqna naŋgo wau di koboonaqa naŋgi olo puluosib Yesus aqa areq aisib naŋgi tulaŋ areboleboleinjrnaqa deqa minjeb, “O Tamo Koba, iga ino ñam na mondor uge uge naŋgi winjreqnamqa naŋgi gago anjam dauryosib jaraioqneb.” 18 Onaqa Yesus na minjrej, “Kola minjal urur mandamq aieqnu dego kere Satan a urur laŋ goge dena uloŋosiq aieqnaq e unonum. 19 Niŋgi quiye. E na Qotei aqa siŋgila niŋgi eŋgonum deqa niŋgi amal uge ti degiŋ ti naŋgo siŋgila tentsib laqnqab. Nuŋgo jeu tamo Satan aqa siŋgila kalil dego niŋgi na kobotoqnqab. Deqa iŋgi bei na yala niŋgi ugeugeiŋgwa keresai. 20 Mondor uge naŋgi nuŋgo anjam dauryosib jaraieqnub niŋgi deqa tulaŋ areboleboleiŋgaiq. Nuŋgo ñam ijo Abu na laŋ qureq dia neŋgreŋyqo unu. Niŋgi deqa tulaŋ areboleboleiŋgem.”

Yesus a tulaŋ areboleboleiyonaqa Qotei pailyej

21 Bati deqa Qotei aqa Mondor a Yesus aqaq aisiq aqa areqalo siŋgilatetonaqa a tulaŋ areboleboleiyonaqa Qotei endegsi pailyej, “O Abu, ni segi laŋ qa ti mandam qa ti Koba. Deqa e ni biŋimosim ino ñam soqtonum. Ijo anjam e na tamo uŋgasari naŋgi minjreqnum qaji di ni na tamo powo ti unub qaji naŋgi qa ulitoqnsimqa tamo aŋgro du du bul naŋgi segi qa babteqnam naŋgi poinjreqnu. O Abu, ni degsim yeqnum di kere. Ni ino segi areqalo dauryosim agi degyeqnum.” 22 Yesus a degsi Qotei pailyej. Osiqa marej, “Ijo Abu na iŋgi iŋgi kalil ijo baŋq di ateleŋej unu. E segi Qotei aqa Ŋiri. Tamo bei a e qa qaliesai. Ijo Abu a segi e qa qalie. Tamo bei a ijo Abu qaliesai dego. E segi ijo Abu qa qalie. Ariya e na tamo qudei naŋgi ijo Abu osornjrqa areibqas di osornjrqai. Yimqa naŋgi dego ijo Abu qa qalieqab.”

23 Yesus a degsi marsiqa aqa aŋgro naŋgi joqsiqa naŋgi segi sasalosib a na minjrej, “Ijo kumbra niŋgi bini uneqnub qaji deqa niŋgi tulaŋ areboleboleiŋgeme. 24 Niŋgi quiye. Nami mandor kokba naŋgi ti Qotei aqa medabu o qaji tamo naŋgi ti tulaŋ gargekoba kumbra niŋgi bini uneqnub qaji di unqajqa maroqneb naŋgi unosaioqneb. Anjam niŋgi bini queqnub qaji di dego naŋgi quqwajqa maroqneb naŋgi quosaioqneb.”

Samaria qaji tamo bei na Juda tamo bei aqaryaiyej. Yesus a deqa anjam sa marej

25 Onaqa dal anjam qalie tamo bei a Yesus aqa siŋgila laŋa unqa osiqa deqa Yesus gisaŋyosiq minjej, “O Qalie Tamo Koba, e kumbra bole kie dauryosiyqa dena e ŋambile gaigai sqai?” 26 Onaqa Yesus na kamba minjej, “Ni Moses aqa dal anjam qalie. Ni gaigai sisiyeqnum. Deqa ŋambile gaigai sqajqa gam di ni segi na mare.” 27 Onaqa tamo dena minjej, “Moses a nami dal anjam endegsi neŋgreŋyej, ‘Ni ino Tamo Koba Qotei tulaŋ qalaqalaiyime. Qalaqalaiysim ino are miligi ti ino qunuŋ ti ino siŋgila ti ino areqalo ti kalil yekritime. Osim ino segi jejamu gereiyeqnum dego kere ino was naŋgi dego geregereinjrime.’” 28 Onaqa Yesus na minjej, “Ni kere maronum. Deqa ni kumbra di yoqnqam dena ni ŋambile oqam.”

29 Onaqa tamo dena aqa segi ñam soqtqajqa are qalsiqa deqa Yesus olo nenemyej, “Tamo yai a ijo was deqa gereiyqai?” 30 Onaqa Yesus na kamba yawo anjam endegsi minjej, “Tamo bei a Jerusalem dena tigelosiqa gam dauryosiq Jeriko qureq aieqnaqa gamq dia bajiŋ tamo qudei naŋgi na a ojsib aqa iŋgi iŋgi kalil yaiyekriteb. Osib aqa gara palontetosib qalougetonab a moiqa laqnaqa gam qalaq di a uratosib jaraieb. 31 A gam qalaq di ŋeiesonaqa Juda naŋgo atra tamo bei a gam dena walwelosiq gilsiqa tamo di unej. Unsiqa a aqaryaiyqa uratosiqa gam qala beiq na buŋyosiqa gilej. 32 Onaqa sokiñalayonaq Juda tamo bei a dego gam dena walwelosiq gilej. A Livai aqa leŋ. A Qotei aqa atra tal taqatoqnej qaji. A gam dena walwelosiq tamo di gam qalaq di ŋeiesonaq unsiqa a dego tamo di aqaryaiyqa uratosiqa gam qala beiq na buŋyosiqa walwelosi gilej.

33 “Ariya olo sokiñalayonaq Samaria tamo bei a dego gam dena walwelosiq gilej. Juda naŋgi mareqnub, ‘Samaria naŋgi tamo uge.’ A gilsiq tamo di unsiqa a qa tulaŋ dulosiqa aqa areq gilsiqa goreŋ ti wain ti osiq aqa jejamu pupoiyeleŋeb qaji di yanseleŋosiqa qoseleŋetej. Osiqa a soqtosiqa aqa donki quraq di atsiqa osi gilsiqa tamo ŋereŋo qaji talq dia gereiyosiq taqatoqnej. 35 Onaqa nebeonaqa Samaria tamo di aqa segi qureq gilqa laqnsiqa ŋereŋo qaji tal taqato tamo aqa baŋq di silali baŋga qudei atsiqa minjej, ‘Ni silali endena tamo di geregereiyoqne. E bosiy ino segi silali baŋga gembub ni olo uratqam di ni kamba emqai.’”

36 Yesus na dal anjam qalie tamo di yawo anjam degsi minjsiqa olo minjej, “Tamo qalub naŋgi gam dena walwelosi gileb. Deqa ni merbe. Tamo yai a tamo gam qalaq di qalnab ŋeiesoqnej qaji aqa was bole?” 37 Onaqa dal anjam qalie tamo a na kamba Yesus minjej, “Samaria tamo agi tamo deqa dulosiqa gilsiq gereiyej qaji di aqa was bole.” Degsi marnaqa Yesus na dal anjam qalie tamo di minjej, “Ni kere maronum. Deqa ni dego gilsim kumbra degsim yoqne.”

Yesus a Marta wo Maria wo naŋgo talq di soqnej

38 Onaqa bati bei Yesus na aqa aŋgro naŋgi olo joqsiqa koba na walwelosi gilsib qure beiq di branteb. Qure dia uŋa bei soqnej aqa ñam Marta. A naŋgi unjrsiqa joqsiq koba na aqa tal gogeteb. 39 Marta aqa jaja bei soqnej aqa ñam Maria. A dego Tamo Koba Yesus unej. Unsiqa aqa siŋgaq di awoosiqa aqa anjam quoqnej. 40 Ariya Marta a naŋgo iŋgi goietnjrqajqa marsiqa deqa wau koba yoqnej. Osiqa Yesus aqa areq gilsiq minjej, “O Tamo Koba, ijo jaja na e uratbqoqa e segi iŋgi goioqnsim iŋgi iŋgi kalil gereiyeqnum. A na e yala aqaryaibosai. Deqa ni na minjimqa a na e aqaryaibem.” 41 Onaqa Tamo Koba Yesus na kamba Marta minjej, “O Marta, ni iŋgi iŋgi kalil qa are koba qaleqnum. Ni iŋgi iŋgi deqa are kobaimaiq. 42 Iŋgi qujai qa are qalqam di kere. Agi Maria a iŋgi qujai di oqo. Iŋgi di tulaŋ boledamu. Di tamo bei na olo yaiyqa keresai.”